ILOILO — Patay ang 72-anyos nga lalaki sang ginlampusan sang paklang sang lubi sa Brgy. Wari-Wari, New Lucena kahapon, Abril 18.
Ginkilala ang napatay kay Samson Sala sang amo man nga barangay.
Suno kay Police Master Sergeant Carlito Berte, imbestigador sang New Lucena Municipal Police Station, papuli na kuntani ang suspek nga si Randy Gil, 34-anyos, samtang nagasakay sa tricycle sang nasugat-an si Sala nga may dala nga utod nga kahoy.
Sang nagpondo ang tricycle, gulpi lang nagpalapit si Sala kag ginhana-an nga lampusan si Gil nga may dala man nga paklang sang lubi, suno sa police.
Tungod sini, naglampusanay ang duha, suno kay PMSg Berte.
Gilayon nga gindala sa ospital ang senior citizen apang gindeklarar nga dead-on-arrival.
Sa pagpangusisa sang police, may daan nga hiligut-anon ang duha.
Preso sa New Lucena MPS si Gil kag desidido nga magpasaka sang kaso ang pamilya sang napatay.
Ginatungaan sang Aksyon Radyo Iloilo nga makuhaan sang pahayag ang pamilya sang mga involved.
