ILOILO CITY — Patay ang 75-anyos nga senior citizen nga babaye nga na-trap samtang nagakasunog ang ila balay sa Barangay Oñate de Leon, Mandurriao subong nga aga.
Ini ang ginkumpirmar ni FINSP. Vergilio Mercado, deputy fire marshal sang Iloilo City Fire Station.
Ginkilala ang napatay kay Teresita Panelo.
Suno kay Mercado, yara sa ikaduha nga panalgan sang balay ang babaye sang nakit-an.
Natumbahan siya sang aparador nga human sa kahoy gani tiil lang niya ang kitaon.
Wala nasunog ang porsyon sang tiil sang babaye nga kitaon suno kay Mercado.
Sa pagpangusisa sang Aksyon Radyo Iloilo News Team, kandila ang ginalantaw ginhalinan sang kalayo.
Antes ang sunog, nagasindi sang kandila ang senior citizen para sa napatay niya nga bana nga ginlubong sang Hulyo 5.
