AKLAN—Nagatutok sa imbestigasyon sa pagpatay kay veteran journalist kag anay Kalibo Mayor Johnny Dayang ang Special Investigation Task Group (SITG) Dayang.
Gintukod sang Police Regional Office (PRO) 6 ang SITG Dayang nga ginapamunuan ni Aklan Provincial Director Police Colonel Arnel Ramos kag gina-supervise ni Police Colonel Joriz Cantoria, Deputy Regional Director for Operations.
Suno kay Police Captain Audrey Ayon, spokesperson sang Aklan Police Provincial Office, imbestigaran sang SITG ang tanan nga anggulo sa pagpatay kay Dayang sa iya balay sa Villa Salvacion, Brgy. Andagao, Kalibo sang Martes sang gab-i.
Gina-imbestigaran sang kapulisan kon maangut sa trabaho ni Dayang bilang anay journalist ukon pulitika ang natabo, ukon personal niya nga naka-away.
Una na nga gin-report nga nagapahuway sa sala si Dayang sang nagdulog ang motorsiklo nga ginasakyan sang suspek sa atubang sang ila balay.
Gingulo sang suspek sa grills sang gate ang pusil kag gintiro ang biktma nga yara sa sulod sang balay, suno sa police.
Natyempuhan nga bukas ang puwertahan sang balay kag ginabanta mga 10 metros lang ang kalayuon halin sa gate, suno sa police.
Nagpalagyo ang suspek pagkatapos sang insidente samtang gindala sa ospital ang biktima pero gindeklarar nga dead-on-arrival tungod sang pilas sa likod kag liug. — Aksyon Farrah Mae Morano
