ILOILO — Pilason ang 41-anyos nga subject sang warrant of arrest sang natiruhan tungod ginpahayag nga nagbatu sa mga pulis sa Brgy. Poblacion North, Lemery kagab-i, Oktubre 12.
Suno kay Police Captain John Robles, hepe sang Lemery Municipal Police Station, serbihan kuntani sang Provincial Intelligence Unit sang Iloilo Police Provincial Office ang subject nga si alyas Rey sang warrant of arrest sa kaso nga double murder.
Ginpahayag ni Robles nga sang ginpalapitan sang police operatives ang subject nga nagpanaug sa iya motorsiklo, nakamutik ang subject gani gintiro ang kapulisan pero wala sang may naigu.
Tungod sini, gintiro sang kapulisan ang subject kag naigu sa wala nga paa gani na-aresto.
Gindala sa ospital ang subject nga yara na sa maayo nga kahimtangan kag detained na sa Lemery Police Station.
Na-recover sa subject ang .38 calibre revolver nga pusil.
Magluwas sa kaso nga double murder, natalana pasakaan sang kaso nga attempted homicide with the use of unlicensed firearm ang subject, suno sa police. — Aksyon Paula Elambayo
