ILOILO — Nagreklamo ang 43-anyos nga taxi driver nga ginsumbag sang iya ginapatihan nga tricycle driver sa guwa sang Dumangas RORO Port sang June 27 sang aga.
Suno kay alyas Dodoy, may gindul-ong siya nga pasahero sa Dumangas Port kag sang pabalik na sa Iloilo City, may nagpapara sa iya ang duha ka senior citizens sa guwa sang puerto.
Sa pagpaathag ni Dodoy, naglapaw na siya sa mga nagapila nga tricycle drivers sang nagpapara sa iya ang duha ka senior citizens.
Ginpabutyag ni Dodoy nga sang ginpindot niya na ang metro sang taxi sang gulpi lang may nagbukas sang pwertahan sa driver side kag ginsumbag siya sa apipingig kag kilid sang tiyan. Dugang niya, ginsipa pa gid siya sa tiil.
Magluwas sa suspek, may apat pa gid ka mga lalaki nga nagatindog sa likod sang taxi nga sa pagpati ni Dodoy , upod sang nagsumbag sa iya.
Tungod sini nag-report sa Dumangas police ang driver kaupod ang duha ka senior citizens nga pasahero niya.
Sang ulihi, nahibaluan sang taxi driver nga una nga nagkontrata ang duha ka senior citizens sa mga tricycle driver pakadto sa Zarraga pero wala sila nagkasugot tungod mahal ang sukot sang mga tricycle drivers.
