ILOILO — Patay ang hinablos sang nagtiruhay sila sang iya tiyo sa Brgy. Madong, Janiuay, kahapon sang aga, Agosto 24.
Suno kay Police Captain Hector Ayagan, officer-in-charge sang Janiuay Municipal Police Station, una nga gintiro sang hinablos nga si Daniel, 43-anyos, ang iya tiyo nga si Marlon, 48-anyos.
Nagpukutay ang duha tubtob naagaw sang tiyo ang pusil kag gintiro man ang hinablos.
Sa imbestigasyon sang police, nagkadto sa iya talamnan si Daniel kag natabuan nga nag-abot si Marlon para magbisita sa iya quarry site. May komosyon nga nagluntad sa magtiyo.
Sang nakit-an ni Marlon nga naggabot sang pusil si Daniel, nagdalagan siya pakadto sa iya pick up.
Ginsundan ni Daniel si Marlon sa salakyan kag nagpalupok sang makaduha ka beses.
Na-igo sa wala nga abaga si Marlon.
Nagpukutay ang mag-tiyo kag nahulog si Marlon sa salakyan pero naagaw niya ang pusil gani nakabalos tiro kay Daniel sang makaduha man ka beses. Na-igo si Daniel sa tiyan.
Gindala sa Western Visayas Medical Center ang duha pero napatay si Daniel samtang ginabulong. Naka-hospital arrest si Marlon.
Sa initial nga pagpangusisa sang police sa pamilya sang magtiyo, istoryahan pa ang pagpasaka sang kaso.
Wala na-recover ang pusil kag wala man sang recoveries nga basiyo sang bala sa lugar.
Sa alegasyon ni Marlon sa police, ginhaboy niya ang pusil kag nalipat kon diin. Away sa duta ang ginasundan sang police nga motibo.
