Pilas sang pagkatiro sa ulo kag wala nga abaga ang ginkamatay sang 40-anyos nga tiyo sang gintiro sang iya 32-anyos nga hinablos sa Brgy. Bolilao, Dumangas mga la-1:45 kahapon.
Suno kay Maj. Kenn Albert Lepsia, hepe sang Dumangas Police Station, una nga ginpaypay sang hinablos nga si Arnel Dellomes ang iya tiyo nga si Crisanto Dagum sa higad sang dalan.
Nagbaisay sila tubtob nga nagpasalba ang suspect sang duha ka beses antes gintiro ang biktima gamit ang 45 caliber pistol.
Gindala pa sa ospital ang biktima apang gindeklarar nga dead-on-arrival.
Na-recover sa crime scene ang mga tsinelas sang biktima kag sang suspetsado kag apat ka basiyo sang 45 caliber.
Nalagyo naman ang suspect dala ang pusil nga gingamit niya sa krimen.
Ginpahayag pa sang police nga antes sang insidente, wala naga-intiendihanay ang suspect kag ang biktima. Nagpa-barangay man sila sang nagligad nga semana apang wala mahusayan.
