Truck driver sa Iloilo Provincial Capitol dakup sa drug bust operation sa Sta Barbara; P7 million nga balor sang suspected shabu na-recover

ILOILO— Nadakpan sa drug buy bust operation ang empleyado sang Iloilo Provincial Government sa Brgy Camambugan, Sta Barbara subong nga hapon.

Subject si alyas Banny, 51-anyos nga truck driver sang provincial capitol kag residente sang Brgy Don T. Lutero East, Janiuay.

Na-recover sa operasyon ang 1,145 grams sang suspected shabu nga may standard drug price nga P7.7 million.

ANUM KA BESES GINTUYO I-OPERATE

Mabudlay nga dakpon si alyas Banny, ang empleyado sang Iloilo Provincial Government suno kay Major Dadje Delima, head sang Provincial Drug Enforcement Unit (PDEU).

Ginpahayag ni Delima nga antes pa siya gin-assign sa PDEU sang 2024, gina-monitor na ang illegal nga aktibidad sang subject.

Anum na ka beses nga gin-attempt sang PDEU nga i-operate si alyas Banny pero wala nagakadakpan.

“Halin sa iya, wala siya naga-tinge-tinge. Siya ang distrubutor, may bodegero kag may kabayo pa gid… Na-trace lang namon siya sa mga dalagku nga drug personality nga gakadakpan namon nga siya man ang ginakuhaan,” suno kay Delima. — Aksyon Farrah Mae Morano