TTMO matukod sang team nga magatutok sa overloading sang mga PUVs sa siyudad

ILOILO CITY–Matukod sang team ang Traffic and Transportation Management Office (TTMO) nga magatutok sa overloaded nga mga depasahero nga salakyan sa siyudad.

Ma-meeting buwas ang enforcement and clearing team sang TTMO agud planuhan ang pag-conduct sang inspection.

Suno kay TTMO Head Ret. Col. Uldarico Garbanzos, i-coordinate niya ini sa Land Transportation Office ilabe pa nga wala naka-deputized ang mga traffic enforcers sa pagpatuman sang anti-sardinas policy sang ahensya.

Ang anti-sardinas policy istrikto nga nagabawal sang overloading sang mga public utility vehicles agud masiguro ang “passenger safety kag comfort.”

Ginpabutyag ni Garbanzos nga makapangdakop lang ang mga traffic aides base sa naga-egsister nga Regulation Ordinance 393 series of 2008 sang siyudad kon diin isa sa ginabawal nga miscellaneous traffic rules ang sobra sa registered seating capacity. — Aksyon Marvin Malificiar