ILOILO CITY — Kritikal ang asawa samtang estable na ang kondisyon sang bana sa ospital sang ginbuno sang mag-amay sa Barangay East Baluarte, Molo Martes sang gab-i, Mayo 13.

Ginkilala ang mag-asawa kanday Rolando, 58-anyos, kag Fatima, 54-anyos.

Suspek ang mag-amay nga Eliseo, 60-anyos, kag Erwin, 28-anyos.

Suno kay Police Captain Ryan Christ Inot, officer-in-charge sang Police Station 4, ginsulod sang mag-amay ang balay sang mag-asawa nga nagakatulog na. Nagaguwa sa imbestigasyon nga napuno ang mag-amay sa pabati-bati nga ginahimo sa ila.

Mahapos nga nasulod sang mag-amay ang balay tungod human sa light materials.

Nagatulog sa separado nga kwarto ang mag-asawa sa diin upod sang asawa ang iya mga bata nga babaye tungod may balatian siya.

Dugang ni Inot, madugay na nga may indi pag-intiendihanay sa duha ka pamilya pero na-areglo na sa barangay. Nag-umpisa ang away sa mga kabataan tubtob nga nag-intra ang mga ginikanan.

Napilasan sa kamot kag butkon si Ronaldo, samtang sa initial nga paglantaw sang police ginabanta walo ang pilas sa likod ni Fatima.

Nadakpan na ang amay nga si Eliseo, samtang nagapabilin nga at-large ang iya bata. — Aksyon Maria Kayla Tingzon