ILOILO— Pasakaan sang kaso ang suspek nga nag-snatch sa 23-anyos nga lalaki sa Q. Abeto, Mandurriao las-12:50 kahapon sang kaagahon, Abril 8.
Suno kay Police Captain Val Allan Cambel, hepe sang Mandurriao Police Station, nagalakat ang biktima sa kilid sang hotel sa Q. Abeto sang may nagdulog nga motorsiklo, nanaug ang angkas kag gin-agaw ang iya nga bag.
Nag-agaway pa ang suspek kag ang biktima gani natumba ang motorsiklo kag na-ula ang sulod sang bag. Tuyo pa kun tani nga kuhaon sang biktima ang wallet pero gintayaan siya sang suspek sang kutsilyo.
Sang nagpalagyo ang mga suspek, nagsinggit ang biktima nga gin-agaw ang iya nga wallet gani ginlagas sang mga grab riders kag mga tricycle drivers.
Pag-abot sa San Isidro, Jaro, posible nga wala ma-anticipate sang mga suspek ang karsada gani natumba, suno sa police.
Nakaagum sang pilas sa ulo ang driver nga si alyas Junjun, 31-anyos gani napatay samtang pilason naman ang angkas nga si alyas Jeb-jeb 23-anyos.
Ginpahayag ni San Isidro Punong Barangay Ronela Juaneza nga ginlagas pa sang mga concerned citizen si Jebjeb tubtob nadakpan.
Na-recover sang pulis ang wallet nga may sulod P250 nga ginapanag-iyahan sang biktima.
Sa pagpangusisa sang police madamo sang record sang pagpangawat ang duha ka suspek sa San Isidro.
Gin-turn over lang sang Jaro police sa Mandurriao ang suspek.
