ILOILO — Naguba ang propeller sang sakayan nga ginasakyan sang 14 ka mga pasahero upod ang kapitan amo nga na-stranded sa lawod sakop sang Punta Buri kag Marbuena Island sa Ajuy las-10 kahapon sang aga, Hulyo 11.
Suno kay Ensign El John Ga, Public Information Officer sang Philippine Coast Guard Iloilo Station, manami pa ang panahon sa Punta Buri Island sang naghalin ang mga pasahero nga kinahanglan magpauli sa ila mga balay sa mainland sang Ajuy.
Dugang ni Ga, indi mapaiway sang mga pasahero ang ila pagbiyahe tungod sa kinahanglan nila magpauli sa mainland.
Mga 200 meters ang kalayuon sa mainland, nagub-an ang sakayan sang ginhampak sang balod.
Gilayon nga nagtawag sang rescue ang isa sa mga pasahero gani madasig man sila nga na-respondehan.
Wala sang napilasan kag safe nga nadala sa mainland ang mga pasahero.
Nagapangabay gihapon ang PCG Iloilo sa publiko kag mga manugpangisda nga ipaiway anay ang pagpalawod tungod sa malain nga tyempo.
