ILOILO — Dead-on-arrival sa ospital ang driver kag backrider sang motorsiklo sang nabungguan sang pick-up sa Barangay Aglalana, Passi City kaina sang aga.
Suno kay Police Staff Sergeant Lenie Rose Piamonte, spokesperson sang Passi City Police Station, halin sa Pontevedra, Capiz ang 20-anyos nga driver sang pick-up nga pakadto sa Iloilo City tungod mabalik na sa pag-eskwela.
Gulpi lang nagliso pakadto sa higad sang karsada ang pick-up rason nga nalasakan niya ang motorsiklo sa iya unahan.
Magluwas sini, nalab-ot man ang tricycle gani napilasan ang driver kag ang lima pa ka mga bystander lakip ang duha ka tuig nga bata nga babaye kag ang tatlo ka tuig nga bata nga lalaki.
Nag-surrender sa kapulisan ang estudyante nga driver sang pick-up nga subong gina-usisa na sang mga imbestigador. — Aksyon Angel Mae Ciudad
