ILOILO — Pilas sa tuo sa likod nga dulonggan ang naagum sang 37-anyos nga driver sang gintiro sang kasubong niya man nga driver sa Barangay Imbang Pequeño, San Enrique kahapon, Abril 20.
Suno kay Police Captian Dandy Ilalto, hepe sang San Enrique Municipal Police Station, naga-inom ang biktima nga si alyas Remar, 37-anyos kaupod ang suspek nga si alyas Elvin, 30-anyos kag isa pa ka driver samtang gapila sa guwa sang Universal Robina Corporation (URC) agud magpagaling sang karga nila nga mga tubo.
Nagpabati-bati sang istorya parte sa utang ang biktima kag wala naluyagan sang suspek gani may pag-baisay sa tunga nila nga duha.
Magluwas sini, nakita man sang suspek nga gin-reels sa Facebook ang video nga kuha sa iya sang mga grupo sang biktima.
Una nga naglakat ang biktima kag naghambal sa suspek nga hulaton ang iya pagbalik.
Apang naglakat man ang suspek pakadto sa iya truck.
Ginsundan sang biktima ang suspek sa iya truck apang nakita siya gilayon ni Elvin kag gintiro.
Nagpalagyo si Elvin apang nadakpan sa hot pursuit operation sang kapulisan.
Naka-custody na sa San Enrique Police Station ang suspek, ang biktima ang ginabulong pa sa ospital. — Aksyon Angel Mae Ciudad
