Iloilo City: (Update) Ilonggo survivor sa naglugdang nga cargo vessel sa Vietnam, nakapauli na sa iya pamilya

By: Aine Grace Bravo

Nakapauli na sa iya pamilya ang Ilonggo survivor sang naglugdang nga cargo vessel sa kadagatan sang Vietnam sang Enero 2.

Sa bulig sang iya manning agency nga Magsaysay Maritime Corporation, madasig nga nakabalik sa Iloilo si Angelito Rojas, ang chief cook sang Bulk Jupiter. Sa press conference kagab-i, ginsaysay ni Rojas ang iya na-eksperyensyahan sa trahedya.

Suno kay Rojas, tuman ka dasig sang natabu sa diin gulpi lang nga nagtakilid ang barko rason nga naglumpat siya sa tubig kag nabilin ang iya mga kaupod. Ginpasalamatan sini ang iya manning agency, ang tag-iya sang Bulk Jupiter nga Gearbulk-Norway, Department of Foreign Affairs, OWWA kag mga Vietnamese rescuers.

Nagapabilin naman nga missing ang duha pa ka Ilonggo nga tripulante nga sanday Rosilo Sansolis-motorman kag wiper nga si Gilbert Flora.