Barotac Nuevo: 4 kabataan nga natabuan sang ginsunog sang hubog nga amay ang ila balay, na-trauma sa insidente!

By: Jocelyn Gelloagan-Maque

Tuman nga trauma ang nabatyagan sang 4 ka mga kabataan nga natabuan sang nasunog ang balay sa Barangay Cabilawan, Barotac Nuevo.

Nagakulurog kag halos indi maistorya ang mga kabataan nga naga-edad 12, 10, 8 kag 6 ka tuig bangud sa kakulba matapos nasaksihan ang pagkasunog sang ila balay.

Napaso ang walo ka tuig nga si alyas Jay samtang gilayon naman nga nagpadulong sa talamnan kag nagbitbit sang kutsilyo ang 10 ka tuig nga si alyas Jake sang nag-abot ang mga taga-Bureau of Fire Protection.

Nagaka-urungan naman ang kamagulangan nga si alyas Jessa nga amo ang nagbulig luwas sa iya mga manghod.

Sa impormasyon sa mga police, ginpahayag nga ginhaboy sang hubog nga amay nga si alyas Wenceslao sang upos sang sigarilyo ang mga nagatumpok nga bayo nga amo ang ginhalinan sang kalayo. Si Wenceslao ang 5 ka tuig na nga bulag sa iya asawa.