Iloilo City: Mga vendors sa Iloilo Terminal Market, komporme sa rekomendasyon sang Joint Committee sang City Council nga kasuhan ang walo ka city employees nga involved sa anomaliya sa merkado

By: Jocelyn Gelloagan-Maque

Komporme ang mga vendors sa Iloilo Terminal Market (ITM) sa rekomendasyon sang tatlo ka komitiba sang city council nga pasakaan sang kaso ang walo ka empleyado sang syudad bangud sa anomaliya sa merkado.

Suno kay Mr. Dante Manggalisan, presidente sang vendors association sa ITM, wala sang duda nga ang ginrekomendar nga kasuhan amo man ang mga personalidad nga ginatudlo nila nga may kahilabtanan sa ginpahayag tuklu-anay sa merkado.

Satisfied suno kay Manggalisan ang mga vendors bangud magaserbe ini nga paandam sa iban nga empleyado nga indi pagdaug-daugon ang mga nagabaligya sa merkado.

Base sa committee report, kalakip sa mga ginrekomendar nga kasuhan sanday City Administrator Norlito Bautista bangud sang Simple Neglect of Duty, anay Local Economic Enterprise Office (LEEO) Head Vincent De la Cruz kag asawa sini nga si Xenia bangud sang paglapas sa Anti-graft and Corrupt Practices Act, Market-in-Charge Ely Sumaray nga magapangatubang sang Grave Misconduct kag Conduct Prejudicial to the Best Interest of the Service, Fedelyn Villalobos bangud sa isa ka count sang Falsification of Public Documents kag 12 ka counts sang Malversation of Public Funds, Marcela Ymalay para sa 18 ka counts sang Malversation of Public Funds, retired Market Supervisor Enrique Billena nga may 6 ka counts sang Malversation of Public Funds kag Winona Jaudian para sa 223 ka counts sang Malversation of Public Funds.