Iloilo: Masobra isa ka milyon nga cash, nataban sang mga kawatan nga nagransak sa Treasurer’s Office sang tatlo ka banwa sa Quinto Distrito

By: Aine Grace Bravo

Ginabanta sa 1.4 milyones pesos nga cash ang gintaban sang mga kawatan nga nagsulod sa Treasurer’s Office sang Ajuy, Concepcion kag San Dionisio kahapon.

Masobra 745 mil pesos ang ginkawat sa Treasurer’s Office kag Accounting Office sa Ajuy, 281 mil sa Concepcion kag 300 mil pesos naman sa San Dionisio. Ginapatihan sang mga operatiba sang Scene of the Crime Operatives (SOCO) nga bara de kabra ang gingamit sang mga suspetsado sa pagkiwal sang mga vault.

Gilayon nga nagpatawag sang case conference si Iloilo Police Provincial Office (IPPO) Director Sr/Supt. Cornelio Salinas sa mga chiefs-of-police agud ma-address ang insidente. Nagapati ang kapulisan nga pareho nga grupo ang nag-igo sa tatlo ka munisipyo.

Samtang ginpaidalum sa imbestigasyon ang security guard sang Ajuy Municipal Building nga si Danny Apostol matapos gindudahan ang iya pahayag nga wala ini sang may nabatian nga gahod wala sapayan malapit ang iya distansya sa Treasurer’s Office.