Iloilo: Dry Run sang mga Provincial Jeepneys sa Central lines sa Pavia Peoples Terminal, Ginpaiway subong nga adlaw!

By: Nemesio Martirez

Ginpaiway sang mga provincial jeepneys sa central lines subong nga adlaw ang plano nga dry run sa pagsaylo nila sa Pavia Peoples Terminal halin sa ITGSI sa Ungka Jaro. Suno kay Confederation of Iloilo Provincial Jeepney Owners and Drivers Association ukon CIPJODA President Porsing Parreño, ini ang nahisugtan sa sinapol sang grupo upod kay Councilor Plaridel Nava, ang chairman sang Committee on Transportation sang City Council, mga drivers kag operators sang city-loop jeepneys kag LTFRB 6. Ginpahayag ni Parreño nga indi niya luyag nga mabutang sa alang-alang ang mga miembro sang CIPJODA bangud sa kawad-an sang provisional authority halin sa LTFRB. Nahadlok man suno sa iya ang iban nga transport associations nga mag-risgo bangud sigurado nga mamulta sila sang dako kon madakpan nga naga-cutting trip ukon out of route ang ila salakyan. Magluwas sini, gin-ako man ni parreño nga madamo sang mga presidente sang transport associations sa central lines ang wala pa nakahangup sang plano. Ginpasiguro naman ni Parreño nga dayunon nila ang dry run kon ma-isyuhan sang provisional authority sang LTFRB kag hatagan sang kopya ang mga transport associations nga luyag mag-upod.