Iloilo City: Mga department heads nga involved sa isyu sang traffic lights, nagpaguwa sang joint statement

By: Aine Grace Bravo

Nag-isyu sang joint statement ang mga department heads sang City Government nga may kaangtanan sa isyu sang pagbakal kag pag-install sang mga traffic lights.

Ginpamunuan ni City Legal Officer Dan Dinopol ang pagbasa sang statement bilang reaksyon sa natalana nga imbestigasyon sang City Council sa isyu. Ginpa-athag ni Dinopol nga indi na kinahanglan ni Mayor Jed Patrick Mabilog nga magpangayo sang otoridad sa konseho agud magpirma sa kontrata para sa installation sang traffic lights bangud na-aprubahan na sang Sangguniang Panlungsod ang pundo para sa proyekto. Wala naman nagapareho suno sa iya ang presyo sang mga traffic lights base sa standards nga ginapangita sang procuring agency nga amo ang city government.

Gindepensahan man sini ang nagdaug nga bidder sa pagsiling nga may records of completion ang supplier kag Certificate of Compliance halin sa mga nagligad sini nga kontrata. Nakapasar man ini suno sa iya sa eligibility kag may yara sang mga valid documentary requirements nga gina-require sang Procurement Law.

Ginpahayag sini nga nasumiter na sa City Council ang nasambit nga mga dokumento sang nagligad nga adlaw.