Iloilo: Pito ka Banwa sa 1st District, Nagtukod sang First Iloilo Response ang Support Team (THE FIRST) para sa Kalamidad

By: Jocelyn Gelloagan-Maque

Magabuligay ang 7 ka banwa sa premier distrito sa tion sang kalamidad. Ini ang rason suno kay Miag-ao Mayor Doc Mac Napulan kon ngaa gintukod ang THE FIRST ukon First Iloilo Response and Support Team.

Suno kay Napulan, katuyuan sini nga ipadala sa lugar nga mahalitan sang kalamidad ang mga rescue equipment, rescuers, heavy kag communication equipment.

Ipahamtang ang command center sang THE FIRST sa Guimbal agod magbaton sang call-up kag ma-responderan ang mga lugar nga nagakinahanglan sang bulig.

Gintukod ang THE FIRST suno kay Napulan bangud ang 7 ka kabanwahanan ang prone sa kalamidad ilabi na ang Miag-ao nga may coastal barangay nga mahimo igo-on sang storm surge kag may mountainous barangay man nga prone sa baha kag landslides.

Ang  First  Iloilo Response and Support Team  ginalakipan sang Oton, Tigbauan, Guimbal, Tubungan, Igbaras, Miag-ao kag San Joaquin.