Balay sa Janiuay, gin-strafing; 2 ka miembro sang pamilya Tidula, pilason

Janiuay, Iloilo–Napuhag ang nagakatulog nga pamilya Tidula sa Barangay Golgota, Janiuay matapos ginpa-arakan tiro ang ila balay kagab-i.

Napilasan sa strafing ang 13-anyos nga si Eddie nga naigo sa paa kag naglapos sa tiyan. Padayon ini nga ginabulong sa Western Visayas Medical Center. Samtang nagapabilin sa Janiuay District Hospital si Shirley, iloy ni Eddie, nga may kibyas sa ulo.

Apat ka basiyo sang m14 kag apat ka basiyo sang 45-caliber pistol ang na-recover sang Janiuay police malapit sa balay sang pamilya Tidula.  May nakita nga tatlo ka buslot sa dingding sang balay nga posible igo sang m14 kag 45-caliber pistol.

Suno kay PO3 Jeffrey Sirwe, imbestigador sang Janiuay Police Station, nagakatulog ang lima ka miembro sang pamilya Tidula sang natabu ang strafing. Padayon ang imbestigasyon sang mga pulis sa natabu. (Aine Grace Bravo)