Amay sang panimalay nga gin-raid sang PDEA 6 kag Banate police, gintudlo ang iya bata nga naga-repack sang illegal drugs

Banate, Iloilo– Ginpanghiwala ni Warlito Onofre, 55 anyos sang Barangay Managopaya, Banate,  nga naga-engage siya sa illegal drugs trade.

Apang gin-ako sini nga nakita nga naga-repack sang illegal drugs ang iya bata nga si Warren kaupod ang iya abyan sa ila payag. Suno kay Warlito, ginsaway man sini si Warren nga untatan ang ginahimo apang wala siya ginpamatian. Gin-athag man ni Warlito nga indi siya ang nagapanag-iya sa na-recover nga mga pusil sa ila balay.

Samtang gin-ako naman ni Wilmar Onofre nga nagagamit siya sang illegal drugs apang wala siya nagabaligya. Ginpanghiwala man sini nga nagabulig siya sa iya magulang nga si Warren sa pag-repack sang illegal nga druga.

Nakapalagyo sa raid si Warren samtang arestado sanday Warlito, Wilmar kag asawa ni Wilmar nga si alyas Neneng. (Aine Grace Bravo)