City Councilor Lyndon Acap, nagbalibad sa paghatag sang reaksyon sa pagtestigo sang iya bata-TMTRO OIC Donna Acap kontra kay Councilor Plaridel Nava

Iloilo City–Wala sang ideya si councilor Lyndon Acap sa pag-execute sang affidavit sang iya bata nga si TMTRO OIC Donna Acap sa gin-file nga kaso ni Mayor Jed Patrick Mabilog batuk kanday Councilor plaridel Nava, ICLAJODA President Boyet Parcon kag chief-of-staff sang konsehal nga si Paul Sabio.

Gin-ako ni Acap nga wala nagapangonsulta sa iya ang bata kag nahibaluan lang ang isyu sang naguwa ini sa media. Luyag sini nga pamangkuton ang iya bata angut sa nabutang sa affidavit sini nga ginasinggitan kag ginapahog siya ni Nava rason nga napilitan siya mag-release sang driver’s license sang mga drivers nga nadakpan nagalapas sa traffic rules sang syudad.

Indi magpati ang konsehal nga mahimo ni Nava ang pag-harass sa iya bata bangud madugay na sila nga kumparehay kag suod sila nga mag-abyan bilang mga anay miembro sang Voltes 5. Nasubuan naman si Acap sa nagtuhaw nga isyu bangud nabutang siya sa tunga-tunga.

Nagapati si Acap nga kabahin lang sang mga konsekuwensya sa trabaho sang iya bata ang isyu. (Aine Grace Bravo)