Councilor Plaridel Nava, liwat nag-file sang kaso kontra kay Mayor Jed Patrick Mabilog, BAC Chairman Joren Sartorio angut sa pagbakal sang Syudad sang 6 ka Wheel clamps

Iloilo City — Nagapangatubang sang kaso kriminal kag administratibo si Mayor Jed Patrick Mabilog, Chairman kag ang duha ka miembro sang Bids and Awards Committee (BAC) may kaangtanan sa pagbakal sang syudad sang anum ka wheel clamps.

Nagpasaka sang kaso si Councilor Plaridel Nava sa Ombudsman Visayas kaina sang hapon.

Magluwas kay Mabilog, nalakip man sa kaso sanday BAC chairman Joren Sartorio kag BAC members Jess Sio kag Norlito Bautista bangud sa ginpahayag iregularidad sa bidding.

Ginpasakaan man sang kaso kriminal sanday Mrs. Pacita Sio-Uy, tag-iya sang Narita Electric Center kag bana sini nga si Felix Uy nga tag-iya naman sang Nippon Engineering Works nga nagapasakop sa bidding.

Mag-asawa nga Uy ang ginpahayag himata ni BAC member Jess Sio.

Ginaalegar ni Nava nga overpriced ang ginbakal nga 6 ka mga wheel clamps bangud nagabili ini sang tag-P24,000 nga may kabug-usan nga balor nga P144,000 halin sa nagdaug nga bidder nga Narita Electric Center.

Tuman ini kalayo sa presyo sang 3l Towing Services nga nagabili lang sang P830.25 ang kada unit. (JoMaque)