Dismissal order sang Ombudsman, ginkwestyun ni IPPO Director Sr/Supt Cornelio Salinas

Iloilo–Ginkuwestyun ni IPPO Director Sr/Supt. Cornelio Salinas ang ginpahayag sini pag-umid sa iya sa dismissal order sang Office of the Ombudsman may kaangtanan sa ma-anomaliya nga pagbakal sang motorized banca sang PNP Maritime Group.

Suno kay Salinas, kon paminsaron wala sang sala ang mga miembro sang Bids and Awards Committee sang Maritime Group bangud nagsunod sila sa husto nga proseso sang bidding sa pagbakal sang mga motorized banca. Kon may dapat man nga manabat suno sa iya, wala sang liwan kundi si Colonel Job Marasigan, hepe sang PNP Logistics Support nga amo ang nagpirma agud i-release ang theke para sa mga motorized banca nga wala ginbaton sang Maritime Group.

Ginrekomendar mismo sang PNP-CIDG nga kasuhan si Marasigan bangud sa iya kapaltahan apang nadalahig ang mga wala sang sala suno kay Salinas. Ginpabutyag ni Salinas nga wala man lang sila nahatagan sang tsansa nga maka-depensa sang ila kaugalingon.

Nagalaum ini nga matun-an sang Ombudsman ang mga ebidensya agud maguwa ang kamatuoran sa ulihi kag mahatagan siya sang hustisya. (Aine Grace Bravo)