BFP, nagpahanumdom sa publiko nga maghalong agud makalikaw sa sunog sa Fiesta Minatay

Iloilo City–Ginpahanumdom ni Fire Supt. Gerry Candido, Iloilo City Fire Marshall sang Bureau of Fire Protection ang mga publiko nga mangin mahinalungon agud makalikawa sa sunog sa Fiesta Minatay.

Ginlaygayan ni Candido ang mga pumuluyo nga likawan ang pagbilin sang mga nakasindi nga kandila ukon mga nakasaksak nga appliances sa ila balay kon magpadulong sa mga sementeryo.         Siguraduhon suno sa iya nga napatay ang tanan nga switch sa puluy-an antes ikandado kag bayaan. Gintumod ni Candido ang mga octopus connection sang mga daan nga linya sang kuryente nga masami ginahalinan sang dako nga sunog.

Kon yara naman sa sementeryo, dapat nga ipalayo sa kandila ukon saksakan ang mga pagkabutang nga madali maduktan sang kalayo kag mag-angut sa lisensyado nga electrical connection. (Aine Grace Bravo)