Gov. Arthur Defensor, dismayado sa wala pa natapos nga imbestigasyon may kaangtanan sa hatagay sang assistance sa mga biktima sang Supertyphoon Yolanda

Iloilo–Indi kuntento si Governor Arthur Defensor sa sistema sang tagtaganay sang shelter assistance sa mga benipisaryo sa probinsya matapos wala gihapon natapos ang imbestigasyon sang DSWD sa amo nga kontrobersiya.

Sa obserbasyon sang gobernador, may yara sang sala sa sistema bangud indi insakto ang pag-determinar kon sin-o ang nagakadapat kag indi nagakadapat hatagan. Gintumod sini ang mga nagareklamo nga nagub-an sang balay nga wala nakabaton sang bulig pinansyal samtang nakabaton ang mga wala nahalitan sang bagyo kag ang pagkakas sang ila mga pangalan sa listahan sang mga benipisaryo sang shelter assistance.

Gin-ako ni Defensor nga wala nagapahilabot ang provincial government sa shelter assistance distribution apang gina-aksyonan niya ang problema sa tion nga may reklamo. Ginhimo sang gobernador ang pahayag matapos wala pa nakapaguwa sang resulta sang imbestigasyon ang DSWD sa mga reklamo wala sapayan masukat na sa duha ka tuig ang paglaslas sang Bagyo Yolanda sa probinsya. (Aine Grace Bravo)