Probinsya sang Iloilo, 70 porsiento na nga nakabangon duha ka tuig matapos ang halit ni Super Typhoon Yolanda

Iloilo — Nakabangon na ang Iloilo ilabe na sa norte duha ka tuig matapos ang paglaslas sang Super Typhoon Yolanda.

Ginabanta ni Provincial Administrator Raul Banias nga 70 porsyento na sang nahalitan sang bagyo ang nakay-o.

Ginpa-athag sini nga ang isa ka component sang Comprehensive Restoration and Rehabilitation Program (CRRP) nga amo ang resettlement site ang wala pa natapos.

Suno kay Banias, nagtigana ang national government sang daku nga pondo para sa pa-gresettle sang mga balay nga nahamtang sa “No Build Zone” pareho sang higad sang baybayon kag mga flood kag landslide-prone areas.

Ginabanta sa 43 mil ka balay ang ipangsaylo sa mas luwas nga lugar kag nagapadayon pa ang proyekto tubtob subong.

Halos natapos naman ang iban pa nga components sang CRRP pareho sang paghatag sang palangabuhian kag pagkay-o sang naguba nga infrastructures pareho sang eskwelahan, municipal gym kag iban pa nga public facilities.  (JoMaque)