Update: Driver sang Melvin Taxi nga gintudlo nagtiro patay sa election officer sang Dumangas, nagsurrender!

Iloilo City–Wala ginatolerar sang management sang Melvin Taxi ang pagdala sang pusil sang ila mga drivers kon magbiyahe.

Pahayag ini ni Atty. Ediljulio Romero nga abogado sang Melvin Taxi kasunod sang pagsurrender ni Radnie delos Reyes nga gintudlo nagtiro patay kay Dumangas Municipal Election Officer Raymund Valera. Suno kay Romero, hugot nga ginadumili sang management ang pagbisyo sang ila mga taxi driver kon magbiyahe kag lakip na diri ang pagdala sang pusil. Sa pagsaysay suno sa iya ni delos Reyes, nagsugod ang away nila ni Valera sa Arevalo matapos nga naggitgitanay sa karsada ang ila salakyan. Ginpa-athag man suno sa iya ni delos Reyes nga nagadala siya sang pusil kon magbiyahe lang bilang depensa batuk sa mga holdaper.

Nagsurrender pasado alas-8 kagab-i si delos Reyes matapos nga ginsugat ni Romero sa Lapaz. Dala man sang driver ang pusil. (Aine Grace Bravo)