Driver sang Melvin Taxi nga gintudlo nagtiro patay sa Election Officer sang Dumangas, pasakaan sang kaso nga Murder With the Use of Unlicensed Firearm

Iloilo City — (UPDATE)  Kaso nga murder with the use of unlicensed firearm ang ipasaka batuk kay Radnie Delos Reyes sang Barangay Cateringan, Igbaras kag driver sang Melvin taxi nga gintudlo nagtiro patay kay Dumangas Comelec Officer Raymond Valera.

Molo Police Station lang anay ang mapasaka sang kaso batuk kay Delos Reyes suno kay Chief Inspector Rio Maymay samtang wala pa nakaabot ang himata sang biktima halin sa Mindanao kag Manila.

Ini ang may pahanugot man sang fiskaliya. Death certificate na lang ang ginahulat suno kay Maymay agud mapasaka ang kaso batuk kay Delos Reyes.

Naka-execute na sang judicial affidavit ang duha ka mga testigo nga natabuan sa insidente sa Avanceña Molo sang Nobyembre 8 sang gab-i.

Nag-surrender si Delos Reyes kagab-i sa Molo Police Station kag iya man gin-surrender ang gingamit nga .45 caliber pistol.

“Nagbulig lang”

Nagbulig lang si Atty. Edeljulio Romero bilang legal counsel sang Melvin Taxi agud mapasungka si Delos Reyes.

Suno kay Romero, indi pa konfirmado kon siya ang magatindog nga abogado ni Delos Reyes.

Handa man suno sa abogado nga magbulig ang management sang Melvin taxi kay Delos Reyes kon ensakto ang ginapanghambal sini tuhoy sa natabu.

Ginakonsiderar man suno kay Romero sang management ang sitwasyon bangud sigurado nga maka-apekto sa ila operasyon ang ginhimo sang driver. (JoMaque)