Findings sa kaso nga ginpasaka ni Journalist Manuel Mejorada sa gin-alegar maanomaliya nga pagpatindog sang Iloilo City Hall building, ginpaguwa na sang Fraud Audit Investigation Office sang COA

Iloilo City — Nagpaguwa na sang findings ang Fraud Audit Investigation Office sang Commission on Audit (COA) may kaangtanan sa ginpasaka nga kaso ni Journalist Manuel Mejorada sa gin-alegar ma-anomaliya nga pagpatindog sang Iloilo City Hall.

Suno kay Mejorada, ginpabalo siya sang staff assistant sang Fraud Audit Investigation Office nga ginpadal-an na sang kopya sang report sanday Mayor Jed Patrick Mabilog kag Congressman Jerry Treñas agud magkomento sa findings sang gin-alegar fraud kag iban pa nga iregularidad.

Ini na ang resulta suno kay Mejorada sa gin-conduct nga audit sang 7-man team sang Mayo 2013 matapos nga nagpasaka siya sang kaso batuk kanday Treñas kag Mabilog.

Pa-athag ni Mejorada, kon mabaton na sang COA Fraud Audit Office ang komento kag justification nanday Treñas kag Mabilog, iga-endorso na ang report sa commission proper nga magadeterminar kon ano nga aksyon ang himuon.

Nobyembre 2011 sang ginfile ni Mejorada ang complaint.

Gina-alegar ni Mejorada nga ma-anomaliya ang bidding sang Phase 1 kag Phase 2 sang Iloilo City Hall building. (JoMaque)