Kaso nga pagtiro patay sang driver sang Melvin Taxi sa election officer sa Molo bangud sa gin-alegar away sa trapiko, talakayon ni Councilor R. Leone Gerochi sa hearing sang ginaproponer nga log-in, log-out scheme sa mga taxi drivers

Iloilo City–Talakayon ni Councilor R. Leone Gerochi, chairman sang Committee on Transportation sang City Council, sa ikaduha nga hugnat sang public hearing sa log-in, log-out scheme sang taxi drivers ang pagtiro patay kay Dumangas Municipal Election Officer Raymund Valera.

Suno kay Gerochi, nadalahig sa insidente ang driver sang Melvin Taxi nga si Radnie delos Reyes kag gina-alegar away sa trapiko ang motibo. Sa pagpati sang konsehal, nadula na ang kurtesiya sang mga drivers kabangdanan nagaresulta sang away sa karsada.

Sa masunod nga hearing sang gina-proponer nga ordinansa sa log in, log out sang mga taxi drivers, ipamangkot ni Gerochi sa mga taxi operators kon gina-usisa nila ang criminal records sang mga naga-apply nga driver. Hugot naman sini nga ginakondenar ang pagtiro patay kay Valera nga gin-ako naman ni delos Reyes. (Aine Grace Bravo)