PO2 Gary Catedral nga nagapakuribong kag nagapalupok sang pusil sa hotel sa Jaro, isa ka bulan na nga AWOL sa trabaho suno sa iya superior

Iloilo City–Isa na ka bulan nga absence without leave ukon AWOL sa trabaho si PO2 Gary Catedral.

Ginkumpirmar ini ni Supt. Kim Legada, hepe sang Iloilo City Public Safety Company, kasunod sang pagpinalupok sang pusil ni Catedral sa gina-okupar sini nga kuwarto sa El Haciendero Hotel sa M. Jaime Street, Jaro halin pa kahapon. Suno kay Legada, ginpadal-an pa niya sang return-to-work order si Catedral apang wala ini gihapon nag-duty.

Si Catedral ang nagapangatubang sang kaso administratibo kag nagapadayon ang hearing sa internal affairs service. Gina-proseso man sang Iloilo City Police Office ang pag-AWOL ni Catedral.

Nagpa-blotter kahapon sa Jaro PNP ang mga empleyado sang hotel bangud sa insidente. Ginbawi man sang iban nga mga customers ang ila reservations sa kahadlok nga madalahig sa standoff.

Personal nga nagpadulong sa lugar si ICPO OIC Kashmir Disomangcop, Supt. Legada, Chief Inspector Herbert Ballego kag asawa ni Catedral nga si Chief Inspector Diane Grace Catedral, spokesperson sang Bacolod City Police Station agud mag-negosyar sa suspek.

Nagapadayon tubtob subong nga oras ang negosasyon kay PO2 Catedral.  (Aine Grace Bravo)