Mayor Jed Patrick Mabilog, nag-apelar sa mga kandidato sa Mayo 9 nga eleksyon nga likawan ang below-the-belt nga pagpangampanya

Iloilo City–Nag-apelar si Mayor Jed Patrick Mabilog sa mga kandidato sa syudad nga indi maghimo sang mga below-the-belt nga pagpangampanya batuk sa ila mga kasumpong.

Kasunod ini sang pagpatapik sang tarpaulin sa Plaza Libertad nga nagapakamalaot kag naga-insulto kay Councilor Plaridel Nava.         Suno kay Atty. Mark Piad, legal counsel ni Mabilog, wala ginatolerar sang alkalde ang mga below-the-belt nga pag-atake sa sin-o man nga tawo.

Gin-ako ni Atty. Piad nga gilayon ginmandu ni LEEO Head Ariel Castañeda nga kakason ang ginpatapik nga tarpaulin ni Nava matapos may nakakita sa Plaza Libertad. Ginpa-athag ni Piad nga wala sang ideya ang alkalde sa amo nga tarpaulin kag wala sa karakter sini ang personal nga mag-atake sa isa ka indibidwal.

Ginkasubo lang suno sa iya ni Mabilog ang pagbalos sang kampo sang mga Nava nga direkta nga nagapasibangud sa alkalde.         Ginpahayag ni Piad nga nagakahangawa si Mabilog nga makapalain sa imahe sang syudad kon magpadayon ang ginpahayag below-the-belt campaign sang mga kandidato. (Aine Grace Bravo)