360 million pesos nga utangon sang syudad agud ipatindog sang school buildings, aprubado na sang City Council!

Iloilo City–Ginpaboran sang mayorya sa konseho ang resolution ni Councilor Ed Peñaredondo, chairman sang Committee on Appropriations, nga nagahatag sang authority kay Mayor Jed Patrick Mabilog nga magpirma sa 360 milyones pesos nga bank loan agreement sa Land Bank of the Philippines.

Ang kantidad pagagamiton sang city government sa pagpatindog sang 160 ka mga classrooms para sa incoming senior high school students sa idalum sang K-to-12 program sang Department of Education.        Sa regular session kahapon, ginpa-athag ni Peñaredondo nga gamay lang ang interest nga bayaran sang syudad sa kada quarter sa Land Bank of the Philippines kon ikumparar sa iban nga bangko.

Bisan nagpamatok kag ginkwestyun nanday Councilors Plaridel Nava kag Joshua Alim sa resolution, gin-aprobahan gihapon ini sang mga konsehal.

Ginhatagan man sang authority si City Treasurer Katherine Tingson nga mag-coordinate sa Bangko Sentral ng Pilipinas may kaangtanan sa hingyo sang syudad nga monetary board opinion para utangon nga kandidad. (Aine Grace Bravo)