IPPO Director PSSUPT Roderick Alba, nagmando sang imbestigasyon sa makaduha ka beses na nga pagpalagyo sang preso sa Alimodian Police Station

Iloilo–Nagmandu sang impartial investigation si Iloilo Police Provincial Office Director PSSUPT Roderick Augustus Alba may kaangtanan sa makaduha ka beses nga pagpalagyo sang preso sa Alimodian Police Station.

Katuyuan sini nga mahibaluan kon sin-o ang may lapses sa pagpalagyo sang preso nga si Erwin Calbonero, 37-anyos sang Sitio Balogo, Barangay Paho, Alimodian kag may kaso may kaangtanan sa illegal drugs.

Kaso administratibo posible atubangon sang police on-duty kon mapamatud-an nga nagpabaya ini sa trabaho. Ginmando man ni Alba ang manhunt operation batuk kay Calbonero.

Una nga nagpalagyo sang Enero 24 si Calbonero sang naglumpat ini sa taytay sa Poblacion sang dal-on siya sa Aleosan District Hospital agud ipa-idalum kuntani sa physical examination. Nadakpan si Calbonero makaligad ang duha ka oras sa Barangay Mangguining nga wala na sang posas. Liwat naman ini nga nagpalagyo sang Enero 26 paagi sa paglagare sang steel bar sa karsel sang Alimodian PNP. (Aine Grace Bravo)