UPDATE: Abogado ni Melvin Odicta alyas Boyet, nagpadala sang letter of appeal kasunod sang pag-revoke sang LTOPF sang mga pusil ni Odicta

Iloilo City–Duha ka mga rason ang gintumod sang abogado ni PDEA-6 identified drug personality Melvin Odicta alyas Boyet sa pagpadala sang letter of appeal kay PSUPT Conrado Carganillo, hepe sang Firearms and Explosives Unit sang Police Regional Office 6 kahapon.

Suno kay Atty. Edeljulio Romero, indi pa final ang resolution sang FEO License Revocation and Restoration Board ukon FLRRB nga naga-revoke sa license to own and possess firearm ukon LTOPF ni Odicta. Ginrason ni Romero nga may kinamatarong nga mag-apelar ang iya kliyente paagi sa pag-file sang motion for reconsideration bilang kabahin sang due process.

Naga-apekto suno sa iya sa kinamatarong sang iya kliyente ang rekomendasyon sang FLRRB nga magpanag-iya sang pusil base sa Comprehensive Firearms and Ammunition Regulation Act.       Ginkuwestyun man ni Romero ang petsa sang ginserbe sang Iloilo City Police Office ang resolution sa iya kliyente. Nagtupa suno sa iya sa Biernes ang Pebrero 12 sang ginserbe ang resolution nga ulihi nga office day kabangdanan wala gilayon naka-aksyon si Odicta.

Ginrekomendar sa resolution sang FLRRB nga kanselahon ang LTOPH sa 12 ka mga pusil ni Odicta bangud nga na-convict ini sa kaso may kaangtanan sa illegal drugs sang Disyembre, 1989. (Aine Grace Bravo)