Kura Paroko sang simbahan sa San Joaquin nga ginatudlo nagsugo sa pagkotkot sa Campo Santo, wala pa nakasabat sa akusasyon suno sa San Joaquin PNP

San Joaquin, Iloilo — (Update) Ginapangayuan-an sang paathag sang San Joaquin PNP si Father Nelson Silvela, ang kura paroko sang simbahan angut sa pagkutkot sa Campo Santo, ang sementeryo sang simbahan sa banwa.

Luyag kuntani ni Senior Inspector Raymond Gemarino, ang hepe sang San Joaquin PNP, nga mahibaluan kon sin-o ang nagsugo sa pagkutkot bangud ginapanag-iyahan sang Roman Catholic Church ang Campo Santo.

Apang sa pihak sang pagpaninguha sang mga pulis, wala ginasabat ni Father Silvela ang ila tawag.

Gin-arestar sang San Joaquin PNP ang 10 ka mga tawo nga nagkutkot bangud nagalapas ini sa Republic Act 10066 ukon Protection of National Cultural Heritage.

Kon may proyekto gid man ang National Historical Commission sa Campo Santo suno kay Gemarino, dapat nga mabal-an sang Department of Tourism kag sang local government unit kag mag-secure sang permit ang nagkutkot.

Naglawig sang masobra duha ka bulan ang digging activity sa Campo Santo nga may kadalumon na nga 50 ka tapak.

Indi man makasiguro si Gemarino nga pagpangita sang bulawan ang tuyo nga pagkutkot sa Campo Santo. (JoMaque)