Jaro Archbishop Angel Lagdameo, magahimo sang imbestigasyon sa pagkutkot sa Camposanto de San Joaquin

Iloilo City–Magahimo sang imbestigasyon si Jaro Archbishop Angel Lagdameo agud hibaluon ang kamatuoran sa pagkutkot sang Camposanto de San Joaquin.

Kasunod ini sang pag-relieve kay Father Nelson Silvela bilang ang kura paroko sang banwa nga nag-file sang leave of absence. Nadalahig ang pari sa gin-alegar treasure hunting sa Camposanto kag isa sa 11 ka ginkasuhan sang San Joaquin police nga naglapas sa Protection of Natural Cultural Heritage Act.

Suno kay Monsignor Joemarie Delgado, director sang Jaro Archdiocesan Commission on Social Communications, nagaplano man si Archbishop Lagdameo nga magpatawag sa mga miembro sang National Museum kag National Historical Institute agud magpangayo sang bulig sa cultural nga aspeto sang imbestigasyon.

Indi naman magtandog suno sa iya si Lagdameo sa ginfile nga kaso batuk kay Silvela bangud indi na ini sakop sang simbahan. Posible nga istoryahon sang arsobispo si Silvela kag iban pa nga personalidad nga may ihibalo sa pagkukot sa Camposanto agud pangayuan sang paathag.

Sugod sang naglupok ang balita, wala na nakamisa si Father Silvela kag wala man ini nakahatag sang pahayag sa isyu matapos nga siya ang ginatudlo nagsugo sa pagkutkot. (Aine Grace Bravo)