Lalaki, patay matapos nga naaksidente sa radial road sa Sta. Barbara

Iloilo — Balda gid ang lalaki nga nalabayan na lang sang mga katapo sang newspaper nga The Daily Guardian kag Capiz Police Provincial Office sa radial road sa Barangay Magancina, Sta Barbara kagab-i.

Madulom ang area suno kay Mr. Rannie Janggayo bangud wala nagasiga ang mga street lights.

Tiempo man nga naglabay ang taga-CPPO gani ang ila nga patrol ang naghatag sang suga agud magsanag ang palibot.

Gin-identify sang ulihi ni punong barangay Perfecto Borra sang Magancina ang biktima kay Quirino Suganob alyas Bonyot nga nakapangasawa sa ila barangay.

Nagbulag gid sa iya lawas ang t-shirt nga ginasuksok ni Suganob kag naluslos ang cargo shorts bangud ginapatihan nga nayudyod pa ini sang salakyan nga nakabunggo sa iya.

Nagresponder man ang taga-Alerto, Sta Barbara Rescue Group nga nagdala sa biktima sa Western Visayas Sanitarium.

Wala gid nakilala ang driver sang puti nga salakyan nga ginapatihan amo ang nakabunggo kay Suganob.

Suno ka PO3 Roger Calambro sang Sta Barbara Police Station, wala sang nakakita bangud madulom ang radial road sa Magancina, Sta Barbara nga ginluntaran sang insidente.

Pero nagalaum si Calambro nga konsensyahon man ang driver sang salakyan kag balikan ang iya nabiktima. (JoMaque)