Wing van nga may mga karga nga delata, nahulog sa taytay sa coastal road sa Balabago, Jaro.

Iloilo City — Nagpalumba-anay ang duha ka wing van sa Balabago Jaro antes aksidente nga nahulog sa taytay sa amo nga barangay.

Ginpahayag ni security guard Lorenzo Declarador sang Empress Trucking Services sa Brgy. Balabago, nga iya nakita ang duha ka wing van nga nagasundanay, madasig ang dalagan kag nagapamusina sang malawig.

Natingala na lang si Declarador nga nadula na ang nagasunod nga wing van kag may nabatian nga mabaskog nga lagapok kag ulihi na lang siya nakahibalo nga nahulog ang salakyan sa taytay.

Nabal-an lang nga naaksidente ang isa ka wing van pasado alas 4 kahapon sang kaagahon.

Patay ang driver sang truck nga si Joel Manigos kag helper nga si Jenery.

Gingamitan sang crane sang Bureau of Fire Protection ang pagkuha sa truck bangud naglubong ini sa kilid sang sapa.  (JoMaque)