Mga local candidates sa probinsya sa May 9 elections, nagtipon para sa peace covenant signing

Iloilo–Nagtipon ang mga kandidato sa provincial level sa peace covenant signing kaina sang aga sa pagpanguna sang Iloilo Police Provincial Office, Provincial Comelec kag Philippine Army.

Nagtambong sa provincial peace covenant signing ang 29 ka mga kandidato nga nag-file sang ila certificate of candidacy sa pagka-gobernador, bise gobernador, district representatives kag board member. Ginhiwat ang signing sa IPPO grounds sa Camp Francisco Sumagaysay sa Sta. Barbara alas-9 kaina sang aga matapos ang misa nga ginpangunahan ni Monsignor Meliton Oso.

Suno kay Pastor Andres Sonza sang PNP Interfaith sang IPPO nga nabase sa Passi City, ang covenant pamaagi agud makuha ang commitment sang mga kandidato nga suportahan ang malinong kag matawhay nga eleksyon sa Mayo 9. Pamaagi man ini agud ipakita nga may paghidaet sa kada kandidato sa probinsiya. (Aine Grace Bravo)