Mga pulis, may pangalan na sang isa sa mga suspek sa pagpatay sa HR supervisor sang Taytay sa Kauswagan!

Iloilo–May pangalan na ang mga pulis sang isa sa tatlo ka suspek sa pagpatay kay Leah Sorongon-Pasamonte, ang HR Supervisor sang Taytay sa Kauswagan, Inc. nga nasapwan sa Barangay Taslan, Dumarao, Capiz sang Biernes Santo.

Pero nagpangabay si Iloilo Police Provincial Office (IPPO) Director PSSUPT Roderick Augustus Alba nga indi paglawagon ang pangalan bangud ginatipon pa nila ang mga ebidensya agud mapasaka ang kaso. Lakip sa mga ebidensya sang police ang CCTV footages, scientific examination result kon nahimuslan ang biktima, autopsy, SOCO report kag judicial affidavit sang mga testigo.

Indi man malawag ang motibo bangud tama ka sensitibo ang kaso. Ginpakamaayo sang composite team nga naga-conduct sang imbestigasyon nga itugyan sa Dumarao police ang pagpasaka sang kaso bangud sa ila hurisdiksyon nasapwan ang bangkay ni Pasamonte.

Blangko naman si Mr. Teddy Pasamonte, bana sang biktima, sa motibo sa pagpatay sa iya asawa. Base sa nakita sini sa sitwasyon sang bangkay sang asawa, grabe suno sa iya ang kaakig sang mga suspetsado.

Indi man mahambal ni Mr. Pasamonte nga may kahilabtanan sa trabaho ang pagpatay bangud wala man sang may nakaaway nga officemate ang iya asawa magluwas lang suno sa iya sa insidente sa diin may nag-AWOL nga officemate ang iya asawa kag ini ang ginabasol. Wala suno sa iya nakapanugid ang iya asawa nga may pamahog ini sa kabuhi. (Aine Grace Bravo)