Mga Grade 7 Students sang Philippine Science High-School Western Visayas, Nagpanawagan sang Matinlo kag Matawhay nga Eleksyon

Iloilo City–Nagapanawagan para sa matinlo, matawhay kag masaligan nga resulta sang eleksyon sa Mayo 9 ang mga Grade 7 students sang Philippine Science High School-Western Visayas Campus.

Nagsaka sa Aksyon Radyo Iloilo ang mga kabataan agud ipalab-ut ang ila adbokasiya para sa pagsigurado nga maamligan sang kada botante ang ila sagrado nga boto nga hilway sa anuman nga impluwensiya, pagpamuwersa, baklanay kag iban pa nga indi maayo nga buluhaton sa eleksyon. Suno sa mga kabataan, dapat panumdumon sang mga botante nga ang sahe sang panggobyerno nakadepende sa mga tawo nga ginabutang sa puwesto.

Dapat suno sa ila nga indi magpadala sa kuwarta ang mga botante. Kun may ihatag gid man nga kuwarta ang kandidato, mahimo ini batunon pero dapat magboto depende sa kun sin-o gid ang nahamut-an kag nagaka-angay ibutang sa posisyon. (Aine Grace Bravo)