Posible salabton sang mga Punong Barangay sa Janiuay nga Nagtambong sa Press conference ni Mayor Frankie Locsin kag sang iya asawa, tun-an pa sang Comelec

Janiuay, Iloilo — Tun-an pa sang Commission on Elections kon may salabton ang mga punong barangay sang Janiuay nga nagtambung sa press conference ni Mayor Frankie Locsin kag sang iya asawa nga si Mary Jane Faune nga nagapadalagan nga alkalde sa Mayo 9 nga eleksyon.

Suno kay Comelec 6 Director Rafael Olaño, imbestigaran nila kon mahulog sa mga aktibidad nga ginadumili sang Civil Service Commission kag Comelec ang ginhimo sang 59 sa 60 ka mga punong barangay sa pagpanguna sang ila liga president nga si Cecilia Colada.

Sa Joint Memorandum Circular nga ginpaguwa sang Comelec kag CSC, ginadumilian ang mga government employees kag mga barangay officials nga magpangampanya para sa kandidato ukon partido.

Nagpatawag si Mayor Locsin sang press conference agud sabton ang mga isyu nga ginhaboy sang iya mga anay kaalyado. (JoMaque)