Mga Nagdaug sa Eleksyon sa Iloilo City, Ginproklamar na; Mayor Jed Patrick Mabilog, Nagpasalig nga Suportahan ang mga Programa ni Presumptive President-elect Rodrigo Duterte

Iloilo City–Ginproklamar na ang mga nagdaug nga kandidato sa nagkalain-lain nga posisyon sa syudad kahapon.

Ginalakipan ini nanday re-elected Mayor Jed Patrick Mabilog, Vice Mayor Joe Espinosa III sa pagka-bise alkalde kag incumbent Congressman Jerry Treñas bilang representative sa gihapon sang lone district sang syudad. Sulod sa Final Top 12 Councilors sanday Jeffrey Ganzon, Candice Tupas, Love Love Baronda, Jay Treñas, Mandrie Malabor, Ed Peñaredondo, Armand Parcon, Joshua Alim, R. Leone Gerochi, Plaridel Nava, Inday Lee Zulueta, kag Ely Estante.

Wala naman napunggan ni City Comelec Officer Atty. Joemar Betita ang maghibi sang 100% na nga nakasulod ang mga election returns bangud nagakahulugan ini nga tapos na ang iya trabaho. Nag-recess sang Lunes sang gab-i ang City Comelec bangud sang mga problema sa vote-counting machines nga nangin rason sang atrasado nga pag-transmit sang mga election results halin sa pila ka polling centers.

‘I Will Support’

Nagpromisa naman si Mayor Mabilog nga suportahan ang mga programa ni presumptive president-elect Rodrigo Duterte ilabe na ang kampanya kontra illegal drugs.

Ginpadayaw pa ni Mabilog nga may nadakpan nga dalagku nga drug personalities ang mga otoridad sa syudad antes ang Mayo 9 nga eleksyon. Nagpasalig man si Mabilog nga ipadakup ang mga big fish sa illegal drugs trade kag ipa-rehab ang mga users santu sa mandu sang presidente.

‘Mas Masadya’

Lauman ang mas masadya nga City Council sa masunod nga tatlo ka tuig sa pagdaug nanday Councilors Alim kag Nava. Nagpasalig si Alim nga magapanindugan sila ni Nava kag magaserbe nga fiscalizer sa konseho. Ginpasiguro man sini ang padayun nila nga pagkuwestyun kon may makita nga anomaliya sa proyekto kag programa sang syudad. (Aine Grace Bravo)