UPDATE: Lalaki nga Nagpangtiro sa Ilimnan sa Oton Bangud sa Ginpahayag Pagpangimon, Ginpasakaan na sang kaso

Oton, Iloilo (UPDATE)–Ginpasakaan na sang duha ka counts sang frustrated murder ang lalaki nga gintudlo nagpangtiro sa sulod sang ilimnan sa sulod sang Oton Public Market sang nagligad nga semana.

Suno kay PSUPT Ruby Gumban, hepe sang Oton Police Station, duha lang sa tatlo ka nabiktima ang nagpasaka sang kaso nga amo sanday Sheryl Mae Guevarra nga tag-iya sang ilimnan kag ang seaman nga si Chrisanto Viso. Wala na nagpasaka sang kaso si Arnold Natal bangud nga sa tudlo lang ang iya igo.

Gin-ako naman ni Mr. Parochilen alyas Burgos suno kay Gumban ang mga akusasyon sa iya pero wala na narecover ang pusil bangud ginpahayag sini nga nawigit sang nagapalagyo siya. Naguwa sa imbestigasyon nga nangimon si alyas Burgos bangud gin-table sang seaman ang iya ginapangaluyagan gani nga gintiro sini pero nasalabat sanday Guevarra kag Natal. (Aine Grace Bravo)