2 ka Bangkay nga Gintapok sa Syudad kag Probinsya Kaina sang Aga, Nakilala na!

Iloilo— Ginpuhag sang duha ka magkasunod nga balita sang pagkasapo sang mga bangkay ang siyudad kag probinsiya sang Iloilo kaina sang aga.

Una nga nasapwan ang bangkay ni Lou Facto,33-anyos sang Sooc, Arevalo sa circumferential road sa Arevalo. Nasapwan ang bangkay ni Facto nga nagapos ang kamot sa atubang kag naputos sang packing tape ang ulo. Si Facto ang may madamu sang pilas sang pagkatiro sa ulo, wala nga paa kag dughan.

Suno kay Punong Barangay Ricardo Tugado sang Sooc, wala sang trabaho si Facto kag ginbanta tatlo pa lang ka bulan nga nakaguwa sa presuhan. Gin-aresto ini sa buybust operation sang Arevalo police.

Ginapatihan nga drug-related ang natabu kay Facto matapos gin-ako ni PB Tugado nga nalakip ini sa listahan sang barangay anti-drug abuse council ukon BADAC.

Samtang  ginkilala naman sang iya asawa ang bangkay nga nasapwan sa katigbawan sa Purok 4 Brgy. San Vicente, Leganes. Ang bangkay ni Sherwin Taasan sang Rizal Pala-Pala Dos ang nakit-an nga may pito ka pilas sa lawas kag nabaklid ang mga kamot.

Antes nasapwan ang iya bangkay, nabatian sang mga residente ang madamu nga lupok sang pusil kaina sang tungan gab-i kag may nasiplatan man nga puti nga salakyan nga naghalin sa area sa diin ini nasapwan. (Aine Grace Bravo)