PDEA 6 Director Paul Ledesma, Nagpahayag nga Wala sang Kulbaan ang Pamilya Odicta kon Wala sang Ginatago!

Iloilo City–Wala sang dapat kulbaan ang pamilya Odicta kun wala sila sang may ginatago kag wala sang illegal nga ginahimo.

Ini ang mensahe ni Philippine Drug Enforcement Agency ukon PDEA 6 Director Paul Ledesma kasunod sang pagpa-blotter ni Meriam Odicta sa ginpahayag paglibut-libot sang motorsiklo kag salakyan malapit sa ila balay sa Malipayon-Tanza Esperanza, City Proper. Nagapati ang pamilya Odicta nga posible miembro sang law enforcement agencies ang nagalibot sa lugar kag sila ang target matapos nagguwa ang ila pangalan nga na-angut sa negosyo sang illegal nga druga.

Ginpasiguro man ni Ledesma nga indi practice sang ahensiya ang pagtanum sang ebidensiya sa mga operasyon nga ginaconduct nila batok sa mga drug personalities. Sabat ini ni Ledesma sa pahayag nga handa ang pamilya Odicta magpa-search sa ila balay pero dapat nasantu sa kasuguan kag “wala lang sang plantedanay.” (AGB)